सुवासको पक्षमा व्यवसायिक जनमत बलियो, मतदाता भन्छन्, ‘आफ्नै कारण हार्न सक्छन् प्रकाश’



बिर्तामोड– बिर्तामोड उद्योग वाणिज्य संघको फागुन १६ मा हुने निर्वाचनका लागि उमेद्वार मत माग्दै हिँडिरहेका छन् । आफ्नो प्यानललाई जिताउन अपिल गर्दै उनीहरुले व्यवसायीलाई आफ्नो बाचा र प्रतिवद्धता पनि सुनाइरहेका छन् ।

संयुक्त व्यवसायिक प्यानलका तर्फबाट सुवास भट्टराईको नेतृत्वमा व्यवसायीको टोली मत माग्दै हिँडिरहेको छ । लोकतान्त्रिक प्यानलका तर्फबाट प्रकाश सिवाकोटी नेतृत्वको टोली चुनावी प्रचार अभियानमा छ ।

संघमा निर्वाचित अध्यक्षलाई बिर्तामोड नगरपालिकाको भावी प्रमुख उपप्रमुखका रुपमा पनि हेर्ने गरिएकाले यसमा मतदाताको चासो बढी देखिएको छ ।

‘इमान्दार र व्यवसायीका पीरमर्का बुझ्ने खालको नेतृत्व अबको आवश्यकता हो’, व्यवसायी मीना श्रेष्ठले भनिन्, ‘प्रकाश दाई संघमा बसेको धेरै भयो । यसपटक सुवास दाईलाई जिताउनु पर्छ भनेर साथीहरुलाई भनिरहेकी छु ।’

आफूलाई पार्टी भन्दा पनि स्वतन्त्र बताउने व्यवसायी श्रेष्ठले अनेक चुनौतिका बीच संघका वर्तमान अध्यक्ष कुमार भट्टराईको कार्यकाल सफल र परिणाममुखी भएको बताइन् ।

‘कुमार दाईको पालामा वाणिज्य संघले बिर्तामोडमा ठूलो व्यापार मेला गरेको छ, उनले भनिन् । संघको उक्त व्यापार मेलाका संयोजक चाहिँ अध्यक्षका आकांक्षी प्रकाश सिवाकोटी थिए ।

व्यवसायी श्रेष्ठ मात्रै होइन, अरु धेरै सर्वसाधारण मतदाताका नजरमा तुलनात्मकरुपमा अध्यक्षका दुई प्रत्यासी सुवास र प्रकाश अलग–अलग पृष्ठभूमि, स्वभाव र व्यवसायिक आचरणका छन् । मतदाताले औँल्याएका केही तर्क यस्ता छन् ।

– प्रकाश व्यवसायिक क्षेत्रमा राम्रो सम्भावना बोकेका व्यवसायी हुन् । तर, नेतृत्वमा उनको अहिलेसम्मको प्रस्तुति औपचारिकतामा मात्रै सीमित छ ।

– प्रकाश लामो समयदेखि वाणिज्य संघको कार्य समितिमा छन् । तर, उनको आफ्नो कुनै भिजन छैन । प्रकाश सधैँ अरुको भिजनमा मात्रै चल्छन् । सधैँ रचनात्मकताको खाँचो छ प्रकाशमा ।

– सधैँ व्यवसायीका बीच देखिने सुवास अरुको भन्दा आफ्नो योजनामा चल्छन् । आफैँ योजना बनाउँछन् र कार्यान्वयनमा लैजान सरोकारवाला सबैलाई एकत्रित गर्छन् । सुवासको समन्वय शैली राम्रो छ ।

– सभा समारोहमा आफ्नो धारणा राख्दा प्रकाशलाई सधैँ सकस हुन्छ । उनी सधैँ लिखित भाषण मात्रै पढेर सुनाउँछन् । शब्द चयन र समयलाई ख्याल गर्दैनन् ।

– सुवासलाई मञ्चमा बोल्न लिखित भाषणको सहारा लिनु पर्दैन । व्यवसायिक तर्क र क्षमताका आधारमा उनी मञ्चमा प्रस्तुत हुन्छन् । आफ्नो धारणा राख्छन् र अरुलाई ‘कन्भिन्स’ गर्ने प्रयत्न गर्छन् ।

– प्रकाश हक्की र फुर्के स्वभावका छन् । छिट्टै आवेशमा आउने प्रकाशको कार्यशैली पटक–पटक विवादको घेरामा छ । असहमति राख्नेसँग प्रकाश खरोरुपमा उत्रिन्छन् । उनको स्वभावले उनलाई सधैँ हानी गरेको छ । हारको कारण उनको स्वभाव बन्न सक्छ ।

– तुलनात्मक शालिनता सुवासमा बढी छ । उनी शिष्ट ढंगले आफ्नो तर्क राख्छन् । सुवासको नरिसाउने स्वभाव व्यवसायीका बीच लोकप्रिय छ । आफूसँग असहमति राख्नेलाई तर्कले प्रभावित गर्न सक्ने क्षमता सुवासमा छ ।

– कतिपय मुद्दा मामिला र विवादले प्रकाशलाई अफ्ठयारो पनि पारेको छ । सुवास विवादको घेराबाट सधैँ मुक्त छन् । उनी समग्र व्यवसायीको हितलाई सर्वोपरी ठान्छन् ।

– प्रकाश बिर्तामोडका साना र मझौला व्यवसायीको सम्पर्कबाट सधैँ टाढा छन् । उनी साना व्यवसायीलाई गन्दैनन् । ठूला व्यवसायीलाई मात्रै व्यवसायी ठान्छन् । सानाहरुको हित र व्यवसायिक पक्षमा कम बोल्छन् ।

– सुवास साना ठूला सबै व्यवसायीको पहुँचमा छन् । सानाको संरक्षणमा पनि उनी सधैँ सक्रिय हुन्छन् । ठूला व्यवसायीको साथ, सल्लाह र समर्थन सधैँ लिने प्रयत्न गर्छन् । बिर्तामोडमा व्यवसायिक क्षेत्रबाट गरिने सबै प्रकारका काममा सुवासको समन्वय र सक्रियता देखिन्छन् ।

– कोरोना संक्रमण र यसबाट उत्पन्न परिस्थितिमा बजार बन्दलाई मात्रै समाधानको उपाय ठान्ने स्थानीय तह र प्रशासनको कार्यशैलीविरुद्ध सुवास विरोधमा उत्रिरहँदा प्रकाश चुँ सम्म बोलेनन् । प्रशासन रिसाउला भन्ने डरमा बसे प्रकाश ।

–बिर्तामोडमा सीसी क्यामेरा जोड्ने अभियानमा सुवासको भूमिका नेतृत्वदायी थियो । उनी व्यवसायिक सुरक्षाका लागि प्रविधिमा पहुँच बढाउन चाहन्छन् । बिर्तामोडमा रात्रिकालिन बजारको खाँचो छ भन्ने ठान्छन् ।

–बिर्तामोडबाट निस्कने फोहोरबाट ग्यास निकाल्ने अभियानको एउटा नेतृत्वकर्ता हुन् सुवास । उनी लगायतको अग्रसरतामा झापाको कनकाई नगरपालिकामा बायो ग्यास प्लान्ट निर्माण भइरहेको छ ।

–बिर्तामोडमा व्यवसायिक क्षेत्रले गति लिनुमा सहकारी संस्थाहरुको पनि योगदान छ । सहकारी अभियानमा जोडिएका सुवासले धेरैलाई सहकारीको माध्यमबाट व्यवसायिक क्षेत्रमा स्थापित हुन सहयोग गरेका छन् । उनी सिम्रिक बचत तथा ऋण सहकारी संस्थाका अध्यक्ष पनि हुन् ।

नेपालको कृषिजन्य उत्पादन अलैँचीको निर्यात प्रवद्र्धनमा सक्रिय सुवास अलैँची व्यवसायी महासंघको महासचिव छन् । सामाजिक अभियान र व्यवसायिक विभिन्न संस्थामा सक्रिय उनी अनुभवी व्यवसायी हुन् ।

फोटो : आमसञ्चार