क्वार्टरफाइनलमा पुगेकाहरुको विगत र भविष्य

रुसमा जारी विश्वकप फुटबलको क्वार्टर फाइनल समीकरण पुरा भएको छ । फन्स, रुस, उरुग्वे, बेल्जियम, ब्राजिल, क्रोएसिया, इङ्ल्यान्ड र स्वीडेन अन्तिम आठमा पुगेका छन् । सेमिफाइनल पुग्न फन्सले उरुग्वे, बेल्जियमले ब्राजिल, क्रोएसियाले रुस र इङ्ल्यान्डले स्विडेनको सामना गर्नेछन् ।

क्रोएसिया, रुस र इङ्ल्यान्डले टाइब्रेकरमा जित हात पारेर अघिल्लो चरणमा स्थान बनाएका हुन् । क्रोएसियाले डेनमार्क, रुसले स्पेन र इङ्ल्यान्डले कोलम्बियालाई हराएका हुन् । क्वार्टर फाइनलमा पुगेकामध्ये फन्स, बेल्जियम र ब्राजिलले मात्र अघिल्लो संस्करणमा यो सफलता हात पारेका थिए ।

सोभियत संघबाट टुक्रिएयता रुस पहिलोपटक क्वार्टर फाइनल पुगेको हो । उरुग्वे सन् २०१० पछि पहिलोपटक क्वार्टर फाइनल पुगेको छ । इंग्ल्याण्ड पनि सन् २००६ पछि पहिलोपटक विश्वकपमा अन्तिम १६ पार गर्न सफल भएको हो । क्रोएसिया सन् १९९८ पछि पहिलोपटक अन्तिम ८ मा पुगेको छ । स्विडेनले सन् १९९४ पछि पहिलोपटक यो सफलता हात पारेको हो ।

फन्सविरुद्ध उरुग्वे
सन् १९९८ को विश्व विजेता फन्सले यसपटक प्रिक्वार्टर फाइनलमा साविक उपविजेता अर्जेन्टिनालाई ४-३ गोलले हराएको थियो । फन्सका १९ वर्षीय युवा खेलाडी केलिन एमबाप्पेले दुई गोल गरेका थिए । उनी लयमा देखिएका छन् ।

त्यसअघि फन्सले समूहगत चरणमा संघर्ष गर्नु परे पनि दुई जित र एक बराबरीको नतिजासहित अपराजित थियो । फन्सले पहिलो खेलमा अस्ट्रेलियालाई २-१ गोलले हराएको थियो भने दोस्रोमा पेरुविरुद्ध १ -० गोलको नतिजा निकालेको थियो । समूहको तेस्रो तथा अन्तिम खेलमा डेनमार्कसँग गोलरहित बराबरीमा रोकिएको थियो ।

फन्स अन्तिमपटक सन् २००६ को विश्वकपमा कम्तीमा सेमिफाइनलसम्म पुगेको थियो । सन् १९३० र १९५० को विश्वविजेता उरुग्वेले यसपटक नकआउट चरणमा साविक युरोकप विजेता पोर्चुगललाई २-१ गोलले हराएको थियो । उरुग्वेको त्यस जितमा दुवै गोल एडिन्सन काभानीले गरेका थिए ।

प्रतियोगितामा लुइस स्वारेज र काभानीबीच राम्रो तालमेल देखिएको छ । दुवै खेलाडीले तीन फरक विश्वकपमा गोल गरेको इतिहास छ । यसपटक उरुग्वेले समूहगत चरणमा तीनवटै खेल जितेको थियो । इजिप्ट र साउदी अरबविरुद्ध १-० गोलको नतिजा निकालेको उरुग्वेले अन्तिम खेलमा घरेलु टोली रुसलाई ३-० गोलले हराएको थियो । उरुग्वे अन्तिमपटक सन् २०१० को विश्वकपमा सेमिफाइनलसम्म पुगेको थियो ।

ब्राजिलविरुद्ध बेल्जियम

पाँचपटकको विजेता र दुईपटकको उपविजेता ब्राजिल जारी विश्वकपमा क्वार्टर फाइनल पुग्ने केवल दुई दक्षिण अमेरिकी टोलीमध्ये एक रहेको छ । प्रतियोगिताको क्वार्टर फाइनल पुग्ने चार पूर्वविजेतामध्ये एक रहेको ब्राजिलले यसपटक नकआउट चरणमा मेक्सिकोलाई २-० गोलले हराएर अगाडि बढेको हो ।

उसले समूह चरणको पहिलो खेलमा स्विजरल्यान्डसँग १-१ गोलको बराबरी खेले पनि त्यसपछिका दुवै खेलमा कोस्टारिका र सर्बियालाई समान २-० गोलले हराएको थियो । अन्तिमपटक सन् २००२ मा विजेता बनेको ब्राजिल त्यसपछिका लगातार दुई संस्करणमा क्वार्टर फाइनलबाटै बाहिरिएको थियो ।

ब्राजिलले चार वर्षअघि घरेलु मैदानमा आयोजित विश्वकपमा सेमिफाइनलसम्म पुगे पनि जर्मनीसँग ७-१ गोलले पराजित भएको थियो । ब्राजिल १४ खेलयता अपराजित छ । युवा जोशले भरिएको ब्राजिलका स्टार स्ट्राइकर नेइमार लयमा छन्। यता लगातार दोस्रोपटक क्वाटरफाइनल पुगेको बेल्जियम अन्तिमपटक सन् १९८६ को विश्वकपमा मात्र सेमिफाइनल पुगेको थियो । विश्वकपमा अन्तिम चारसम्म पुग्नु नै बेल्जियमको अहिलेसम्मकै ठुलो सफलता हो ।

यसपटक समूहगत चरणमा निकै राम्रो प्रदर्शन गरेको बेल्जियम नकआउट चरणमा भने भाग्यमानी रह्यो । अन्तिम १६ मा जापानविरुद्ध ६८ औँ मिनेटसम्म २-० गोलले पछाडि रहेको बेल्जियमले अन्तत: ३-२ को नतिजा निकालेर अगाडि बढेको हो ।

बेल्जियमले समूह चरणमा पनामालाई ३-०, ट्युनिसियालाई ५-२ र इङ्ल्यान्डलाई १-० गोलले हराएको थियो । टोलीका कप्तान रोमेलु लुकाकुले जारी विश्वकपमा चार गोल गरिसकेका छन् । बेल्जियम पछिल्ला २३ खेलयता अपराजित छ । उसले करिब दुई वर्षयता अन्तर्राष्ट्रिय फुटबलमा हार ब्यहोरेको छैन ।

क्रोएसियाविरुद्ध रुस

जारी विश्वकपमा क्रोएसिया र रुस दुवैलाई इतिहास बनाउने अवसर छ । सोभियत संघबाट टुक्रिएयता रुस र युगोस्लाभियाबाट छुट्टिएयता क्रोएसिया विश्वकपको सेमिफाइनल पुग्न सकेका छैनन् । दुवै टोलीले जारी विश्वकपमा राम्रो प्रदर्शन गरिरहेका छन् । समूहगत चरणमा क्रोएसियाले नाइजेरियालाई २-० र अर्जेन्टिनालाई ३-० गोलले हराएको थियो भने तेस्रो खेलमा आइसल्यान्डलाई २-१ गोलले पराजित गरेको थियो । क्रोएसियाले नकआउट चरणमा डेनमार्कलाई टाइब्रेकरमा हराएको हो ।

रुसले पूर्वविजेता स्पेनलाई टाइब्रेकरमा पराजित गरी अन्तिम ८ मा स्थान बनाएको हो । त्यसअघि उसले समूहगत चरणका सुरुका दुई खेलमा जित हात पारे पनि तेस्रो खेलमा उरुग्वेसँग ३-० गोलको हार ब्यहोरेको थियो ।

इंग्ल्यान्डविरुद्ध स्वीडेन

सन् १९६६ पछि पहिलोपटक विश्व च्याम्पियन बन्ने प्रयासमा रहेको इंग्ल्यान्डले यसपटक नकआउट चरणमा कोलम्बियालाई टाइब्रेकरमा हराएको हो । उसले समूहको पहिलो खेलमा ट्युनिसियालाई २-१ र दोस्रो खेलमा पनामालाई ६-१ गोलले हराएको थियो ।

उसले अन्तिम खेलमा बेल्जियमसँग १-० गोलको पराजय सामना गरेको थियो । इंग्ल्यान्डका ह्यारी केन ६ गोलसहित जारी प्रतियोगितामा सर्वाधिक गोल गर्ने खेलाडीको सूचीमा शीर्षस्थानमा छन् । इंग्ल्यान्ड सन् १९९० पछि विश्वकपमा सेमिफाइनल पुग्न सकेको छैन ।

यता स्वीडेनले स्विजरल्यान्डलाई १-० गोलले हराएर अन्तिम ८ मा स्थान बनाएको हो । त्यसअघि समूह चरणको पहिलो खेलमा दक्षिण कोरियालाई १-० गोलले हराएको स्वीडेनले दोस्रो खेलमा जर्मनीसँग २-१ गोलले पराजित भए पनि तेस्रो खेलमा मेक्सिकोलाई ३-० गोलले निराश बनाएको थियो ।

Facebook Comments