भद्रपुरमा करसम्बन्धी अन्तरक्रिया

भद्रपुर, मंसिर ३ । छैठौँ कर दिवस तथा कर सप्ताहको अवसर पारेर भद्रपुरमा करसम्बन्धी अन्तरक्रिया गरिएको छ ।

एक सातासम्म विभिन्न चेतनामूलक क्रियाकलाप तथा करदाता शिक्षासम्बन्धी कार्यक्रमका साथ कर सप्ताह मनाउने सिलसिलामा आन्तरिक राजश्व कार्यालय भद्रपुरले झापा उद्योग वाणिज्य संघ र झापा उद्योग वाणिज्य संघसँगको सहकार्यमा आइतबार करसम्बन्धी अन्तरक्रिया गरेको हो ।

झापा उद्योग वाणिज्य संघको सभाहलमा अध्यक्ष नवराज पनेरुको अध्यक्षतामा आयोजित कार्यक्रममा सहभागी उद्योगी-व्यवसायीहरुलाई करसम्बन्धका प्रावधान तथा आर्थिक ऐन २०७५ का सम्बन्धमा जानकारी गराइएको थियो ।

झापा उद्योग संघका वरिष्ठ उपाध्यक्ष यमबहादुर श्रेष्ठले सवागत र झापा उद्योग वाणिज्य संघका महासचिव पंकज शर्माले सञ्चालन गरेको कार्यक्रममा कर अधिकृत प्रकाश राईले आन्तररिक राजश्व कार्यालयले प्रवाह गर्दै आइरहेको सेवा र करका प्रावधानका विषयमा कार्यपत्र प्रस्तुत गरेका थिए भने सहभागीहरुले करका विषयमा राखेका जिज्ञासाहरुको जवाफ प्रमुख कर अधिकृत बालराज आचार्यले दिएका थिए ।

आचार्यले करका विषयमा व्यवसायीहरु आत्तिनुपर्ने कुनै पनि कारण नरहेको बताउँदै समयमै कर दाखिला गर्दा कुनै पनि किसिमको अप्ठ्यारो नहुने जानकारी गराए । उनले करको दायरा फराकिलो बनाउन कर प्रशासन जुटिरहेको बताए । उनले आर्थिक ऐन २०७५ ले वर्षौंदेखि व्यवसाय सञ्चालन गर्दै आएका तर करको दायरामा नआएका फर्महरुका लागि विभिन्न छुटका योजना ल्याएकाले त्यसलाई उपयोग गर्न आग्रह गरे ।

Facebook Comments