सन्थाल नृत्यमा नाचे मन्त्री पण्डित

बिर्तामोड, मंसिर १० । लोप हुन लागेको सन्थाल जातिको नृत्यलाई जगेर्ना गर्ने उद्देश्यले झापामा सन्थाल नृत्य प्रतियोगिता गराइएको छ ।
बिर्तामोडस्थित देवी माविको खेल मैदानमा आयोजना गरिएको सन्थाल नृत्यमा सन्थाल जाति मात्र नाचेनन् कार्यक्रमको उद्घाटन गर्न पुगेका संघीय मामिला तथा सामान्य प्रशासनमन्त्री लालबाबु पण्डित पनि छमछम नाचे ।

जिल्लाभरका दसवटा सन्थाल समूहले सहभागिता जनाएको सो प्रतियोगिता हेर्न स्थानीयको भिड पनि उस्तै उर्लिएको थियो । जो देख्दा लाग्थ्यो त्यहाँ कुनै राष्ट्रिय कलाकारको प्रस्तुति नै चलिरहेको छ । समूहमा पसेर नाच्न थालेको मन्त्री पण्डितले सन्थाल समुदायको लागि सरकारले सांस्कृतिक भवन निर्माण गर्ने उद्घोष नै गरे । उनले मुलुकमा दुईवटा भवन निर्माण गर्नका लागि एक करोड विनियोजन गर्ने आश्वासन दिए ।

मन्त्री पण्डितले सन्थाल समुदायका युवाले आफो जातिको सबै कुराको संरक्षण गर्दै अब सरकारी सेवामा प्रवेश गर्न योग्यता बनाउनु पर्ने समेत बताए । ‘मैले यहाँ जति पनि युवा-युवती देखेँ, सबै दुब्लो र पातलो हुनुहुन्छ, मन्त्री पण्डितले भने, ‘९० प्रतिशत परिवार कठिन श्रम मजदुरी गर्नुहुन्छ, अब उत्पादनमा पनि लाग्नुहोस् ।’ सरकारले रोजगारीको वातावरण बनाइरहेको भन्दै उनले निराशा त्यागेर उत्साही भएर जातीय उत्थानमा लाग्न सुझाव दिए ।

१५ वटा स्थानीय तह रहेको झापामा १० वटा तहबाट सन्थाल समूहले प्रतियोगितामा सहभागिता जनाएको आयोजकको भनाइ छ । जिल्लाका सबै स्थानीय तहको सहयोगमा सन्थाल जाति उत्थान सेवा समाजले जिल्लामा नै पहिलोपटक सन्थाल जातिको नृत्यलाई प्रतियोगितात्मकको रुप दिएको हो ।

समाजका सचिव टिका हस्दाले लोप हुन लागेको नृत्यलाई संरक्षण गर्न कसैले चासो नदिएपछि प्रतियोगिता गरेर हौसला बढाउन खोजेको बताए । उनले प्रतियोगिलाई पुरस्कारको समेत व्यवस्था गरेकाले आगामी दिनमा यो नृत्यप्रति सन्थाल युवा पिढीको पनि ध्यान जान सक्ने बताए ।

शनिबार प्रतियोगितामा सहभागी भएर प्रथम, द्वितीय र तृतीय भएकालाई क्रमश: ५०, २० र १० हजार नगदसमेत दिएको उनले बताए । नृत्यमा प्रस्तुति, भेषभुषा, नृत्य र कलाको आधारमा पहिलो, दोस्रो र तेस्रो छनोट गरिएको आयोजकको भनाइ छ ।

Facebook Comments