‘अल्लाहले बुझेको छ, यो साल हामी संकटमा छौँ’



 

तीर्थ तिम्सिना, बिष्णु लामिछाने
बुधवारे। अघिल्लो बर्षको रोजामा झापा बुद्धशान्तिका ६७ बर्षिय मोहम्मद उजिर घर नजिकको नुरि जामे मस्जिदमा पाँच पटकसम्म नवाज पढ्थे । २५–३० जनाको टोलीमा नवाज पढ्दा उनलार्ई छुट्टै आनन्द हुन्थ्यो । तर यो बर्ष विश्वब्यापी रुपमा फैलिरहेको कोरोना भाइरसका कारण उनी घरमै बसेर नवाज पढ्दै छन् ।

सामुहिक रुपमा नवाज पढ्दा अल्लाह खुशी हुने मोहम्मद उजिरको बिश्वास छ । उनी भन्छन्, ‘घरमा एक्लै बसेर के नवाज पढ्नु ? यस्तो जिन्दगी बाँच्नु भन्दा बरु मरेकै बेस ।’ उजिर मात्रै होइन, सोही ठाउँका ३५ बर्षिय महोम्मद नजिव पनि यतिबेला मस्जिदको अगाडि बसेर बिगतका बर्षहरु सम्झिदै छन् ।

बिहानै उठेर आजान सुनेर उनी मस्जिद जान्थे र दिनभर केही नखाई रिकात पढेर बस्थे । ‘घरमा बसेर कति रिकात गर्ने ? मस्जिदमा जस्तो खुशी कहाँ छ ?’ मोहम्मद आफ्नो पीडा सुनाउँछन् । झापाको बुद्धशान्ति गाउँपालिकामा करिब ३५ घर मुिस्लम परिवार छन् । बन्दाबन्दीका कारण यतिबेला उनीहरु घरैमा बसेर निराहर रही नवाज पढ्दैछन् ।

कोरोनाबाट यो बर्ष बाँचे अर्को बर्षबाट खुसी साथ रोजा बस्न पाइने कुरामा उनीहरु ढुक्क छन् । महोम्मद् नजिव भन्छन्, ‘यसबर्ष रमजान सुनसान र खल्लो भए पनि कोरोना सकिएपछि हामी मस्जिदमा गएर अल्लाहलाई पुकार्ने छौँ, हामीलाई संकट परेको उसले बुझेको छ ।’

विश्वव्यापी रुपमा फैलिरहेको कोरोना भाइरसका कारण देशभर बन्दाबन्दी छ । इस्लाम धर्मावलम्बीहरुको महान् पर्व रमजान शनिबारदेखि शुरु भएको छ । एक महिनासम्म चल्ने यो पर्वमा मुसलमान दिनमा निराहार बस्छन् । मुसलमान समुदायले बिहान ३ः४३ बजेबाट बेलुका ६ः३६ बजेसम्म निराहार बस्नुलाई रोजा भनिन्छ । शरीरलाई चोखो राखेर मात्र रोजा बस्नुपर्ने उनीहरुको मान्यता रही आएको छ ।

रोजाको समय दैनिक सूर्य उदाउने र अस्ताउने समयसँगै समयतालिका पनि परिवर्तन भइरहन्छ । रमजान महिनामा मुसलमानको सबैभन्दा ठूलो ग्रन्थ कुरान अवतरण भएको हो भने यो महिनामा अल्लाहको कृतज्ञता प्राप्त हुने मुस्लिम धर्मावलम्वीहरुको विश्वास छ । दान दिनु, गरीब र दीन दुःखीलाई सेवा गर्नु तथा जकात निकाल्नु यो महिनाको ठूलो विशेषता समेत हो । त्याग, तपस्या र बलिदान सबै जोडिने यो पर्वमा मुसलमान रोजा बस्नुलाई गर्व मान्दछन् ।

नाबालक, बिरामी, घातक रोग लागेका र गर्भवती महिलालाई भने रोजा बस्न अनिवार्य नभएको नुरी जामे मस्जिदका शिक्षक महमद फरिदुल हसन बताउँछन् । उनी बिगत तीनबर्षदेखि उक्त समुदायका करिव ३० जना बालबालिकालाई पढाइरहेका छन् । बन्दाबन्दीका कारण काम गर्न नपाएका सो समुदायका केही स्थानीयहरुले राहत लिएरै भए पनि घरमै रोजा बस्दै आएका छन् ।